Job 27

1 ^aYobu n’ayongera okwogera kwe bw’ati nti,

2 ^b“Nga Katonda bw’ali omulamu, agaanye okusala ensonga yange mu mazima,
oyo Ayinzabyonna, aleetedde emmeeme yange okulumwa,
3 ^cgye nkomye okuba nga nkyalina obulamu mu nze,
omukka gwa Katonda nga gukyali mu nnyindo zange,
4 ^demimwa gyange tegijja kwogera butali butuukirivu,
era olulimi lwange terujja kwogera bulimba.
5 ^eSirikkiriza nti muli batuufu;
okutuusa lwe ndifa, siryeggyako bugolokofu bwange.
6 ^fNzija kwongera okunywerera ku butuukirivu bwange obutabuleka;
omutima gwange tegunsalira musango nga nkyali mulamu.

7“Abalabe bange babeere ng’abakozi b’ebibi,
n’abo abangolokokerako babeere ng’abatali batuukirivu!
8 ^gKubanga ssuubi ki oyo atalina Katonda ly’aba nalyo ng’asaliddwako,
nga Katonda amuggyeko obulamu?
9 ^hKatonda awulira okukaaba kwe
ng’ennaku emujjidde?
10 ⁱAlifuna essanyu mu oyo Ayinzabyonna?
Aliyita Katonda ebbanga lyonna?
11Nzija kubayigiriza ebikwata ku maanyi ga Katonda;
ebikwata ku oyo Ayinzabyonna sijja kubikweka.
12Weekalirize bino byonna bye mwerabiddeko,
lwaki kaakano okwogera ebyo ebitalina makulu?

Empeera y’abakozi b’ebibi

13 ^j“Eno y’empeera Katonda gy’awa abakozi b’ebibi,
omugabo omuntu omujoozi gw’afuna okuva eri oyo Ayinzabyonna:
14 ^kAbaana be ne bwe baba bangi batya, enkomerero yaabwe kitala;
ezzadde lye teririfuna byakulya bibamala.
15 ^lAbo abaliwona kawumpuli, balifa ne baziikibwa,
ne bannamwandu baabwe tebalibakaabira.
16 ^mWadde ng’atereka effeeza ng’enfuufu,
n’engoye ng’entuumo y’ebbumba,
17 ⁿebyo bye yeeterekera omutuukirivu y’alibyambala,
era abo abatalina musango be baligabana effeeza ye.
18 ^oEnnyumba gy’azimba eribeera ng’ey’ekiwojjolo;
ng’akasiisira akazimbiddwa omukuumi.
19 ^pAgenda okwebaka nga mugagga, naye ekyo tekiddemu kubaawo,
kubanga alizuukuka nga byonna biweddewo.
20 ^qEntiisa erimuzingako ng’amataba;
kibuyaga amutwala ekiro mu kyama.
21 ^rEmbuyaga ey’ebuvanjuba emutwalira ddala n’agenda;
emuggya mu kifo kye n’amaanyi.
22 ^sEmukuba awatali kusaasira,
ng’adduka ave mu maanyi gaayo.
23 ^tErimukubira engalo zaayo,
n’emusiiya okuva mu kifo kye.”